Bursdagsparty med sleepover!

Dagen er her, me har offisielt ten-åring i huset! Det starta heftig, med overnattingsbesøk av to små nabo-søskenbarn, som var "forlatt" av foreldra... (neidå, dei er på velfortent helgetur). Eg vekte lillesøster, far i huset, og dei to overnattarane, og me sang bursdagssang og kom med pakkar, lys og litt knask på sengekanten til jubilanten. Så bar det på skule, barnehage og jobb med heile hurven - minus ho mor. På ettermiddagen kom ein gjeng med jenter som skal feira dagen med store-jenta vår! Jammen kjekt med stabburet og godt med overnattingsplass! Pizza, kaker og snop, og sikkert feiring til langt på natt, reknar eg med ; ) Vetle-søster får og vera med litt, og vert sminka og dolla med av dei store jentene, så ho er fornøgd òg!  Bra dei kosar seg! No har eg funne "delvis-horisontalen", og tenkte å få med meg fredags-gull-rekkja. Dorthe gensaren veks (halveges på "fronten", bakstykkjet er ferdig). Og jammen veks magen og... Ting tek litt etter litt meir tid å gjennomføra, men slik skal det vel òg vera : ) God helg!

Midtveke og namnedag!

Eldstejenta var heime i dag òg. Seige greier dette her, men no ser det heldigvis deffinitivt (bank i bordet og kryss i taket) ut til å vera på retur. Og det er bra, for bursdagsfeiringa nærmar seg med stormskritt òg! I morgon vert det kommunestyret på meg. Får sleppa innom innimellom som vararepresentant ; ) Ei kort gjennomlesing av saklista syner at det ikkje er dei heilt heite sakene som skal opp i morgon (då hadde det vel kanskje ikkje vorte innkalla varamedlemmer heller, om det var "heite" saker meiner eg ; ) .....). Ei kjekk jente gjorde meg forresten merksam på at eg har namnedag i dag. Då måtte eg forska litt meir på dette, tenkte eg, og kan fortelja følgjende frå Wikipedia: Navnet Marianne er kjent i Norge fra 1500-tallet. I nyere tid har Marianne vært blant de mest populære døpenavnene på jenter i Norge i perioden ca 1955 til 1985, med en topp i 1967. Marianne er et kvinnenavn med flere opphav. Det kan være en fransk form av Maria, som kan bety «sterk, vakker», eller en variant av det latinske navnet Marina som kan bety «som hører til havet». Det kan også være en sammentrukket form av navnene Maria og Anne, hvor sistnevnte er avledet av Hannah og betyr «gunst» eller «nåde». Jau, jau, happy name-day to me! Og god kveld til alle saman!

Lutafisk og snart julemånad!

Sidan eg vart heime med to sjuke jenter i dag hadde me tid til å laga ein litt "skikkeleg" middag. Det var lapskaus att frå gårsdagen, så kosten var sikra for dei tre andre eg bur med, men eg hadde sååå lyst på lutafisk, så då vart det det! Eg inviterte heller ned nokre naboar som eg veit er like glad i lutafisken som meg, så me fekk unna fisken òg. For lutafisk har eg lika godt sidan eg var lita jente og spurte far min om det var lutafisk eg hadde på kroken ein søndag me var på fisketur på fjorden. Elles har eg nytta dagen litt til å få stulla og stelt litt meir til bursdagsfesten til ten-åringen fredag! Det vert overnattingsfest i stabburet, som tidlegare var utleigehytte!  Får satsa på at forma deira er stigande og bra til då! Betring i sikte no i kveld, iallefall, bank i bordet!

Ein laurdag i november

Etter ei hektisk og innhaldsrik veke er det godt å vakna av seg sjølv ein laurdag og vita at det ikkje er noko spesielt på planen. I går etter skule og jobb vart det Sogndal og kino på meg, eldstejenta og nokre venninner av ho. Twilight - siste del, såg me. Skikkeleg vampyr/vareulv film med all dramatikken som høyrer med rundt temaet. Må sei dei er sjarmerande desse varulvane og vampyrane no for tida, der dei glitrar i sola med dei raude augene sine. Meinar eg las at vampyrar ikkje lika sola i "gamledagar"? Ja, ja, eg kosa meg no storleg med ungjentene på film eg. Såg eit par andre over 30 i kinosalen òg (som forresten var stappfull!), vil eg no få sagt ;). I dag er det grått ute, og dermed "heilt greitt" å kosa seg inne, med strikketøy, fyr på peisen og levande ljos. Mmmmm! Det er som det skal vera: mannen er ute og skaffar mat (jaktar hjort), eldstejemnta og eg daffar litt rundt her, lagar fruktcoctail og middag, minstejenta drog på overnatting over fjorden og ute senkar mørket seg att. God laurdagskveld allesaman. Bilete av ingrediensane i innlegget ser de her:

Dorthe Skappelgenser i emning!

...og ny dag!

Serious...!

Startar friskt med to innlegg på to dagar! I dag er onsdag og i utgangspunktet heimedag for meg. Vert ein del jobbdagar òg desse onsdagane, fordi eg får litt kortare dagar på landbrukskontoret p.g.a. ferjetider, som eg må "henta inn att" innimellom. Men, i dag er eg heime! Skal berre "catering a little food" til nokre svoltne sjeler, eg og systao (ikkje me som er dei svoltne sjelene, altso, me som skal laga maten ;). Utpå dagen vert det ein handletur, er planen: garn til den berømte Dorthe Skappel gensaren, som eldstejenta ønskjer seg, og henting av jenter frå hip hop og gymsal-aktivitetar. Vert litt køyring hit og dit når ein bur så innigranskauen uti der ingen skulle tru...., men det må ein ta med seg. Sit og får gjort unda litt "heimekontorarbeid" no då: bestiller julekort og div. frå Fotoknudsen, sender ut litt hjortekjøtrekningar, planlegg bursdagsfeiring for eldstejenta som vert ten-åring neste helg (!!). Bra spredning i grunn: med dåp neste vår/sommar, og konfirmant våren etter der.... Vel, dette vart eit lite kvardagsglimt frå dagen i dag, ingen store uante hendingar, men det er no eingong kvardagar det er mest av ; )

Nye tider!

Vel eitt år sidan sist!! Ja, tida flyg, det skal vera sikkert. Tok ei stund å koma seg etter det kommunevalet...., neidå det er forlengst historie. No er det nye tider, og ny verdsborgar på veg! Dei to, etterkvart så store jentene våre skal få ein lillebror eller lillesøster på nyåret! Vogn og stellekommode er på plass att (takk vera Finn, vår gode ven ; ) For, det aller meste var gitt bort eller kassert då me i grunnen trudde me var ferdige med produksjonen. Men, neida! Me er i gang igjen, og alle hjarter gledar seg! Kan henda bloggen, om dette ikkje berre er eit "blaff", vert litt meir prega av heimlege, nære sysler framover?! Det vil visa seg. På gjensyn vener!

Refleksjonar etter kommunevalet i Luster

Då var valet over, og resultatet klart. Ny ordførar vert Ivar Kvalen frå SP og Hafslo. Med fare for å verka snurt over å ikkje ha kome i kommunestyret, til tross for eit utg.pkt. som nr. 6 på lista til Ap, prøver eg meg likevel på ei oppsummering av valet. Eg er skuffa, og kva de enn må tru, ikkje over å ikkje koma med i "det gode selskapet". Eg er skuffa over at valet vart ein kamp mellom Gaupne og Hafslo, til tross for at ein kanskje kunne forventa det - historia tatt i augesyn. Listene ga oss inntrykk av ei relativt fin fordeling mellom kjønn og bustadadresse - by og land, kvinne og mann hand i hand. Men, dette synte seg å vera eit spel for galleriet, eller veljarane. For, etter at røystene var opptalde syner det seg at "utkantsrepresentantane" (ja då, eg òg) vart skvisa ut og sentrumsrepresentantane "skvisa" inn. Hafslo samla seg kring Ivar og Sp, og Frp, for å stå sterkt mot "Gåpningane" som samla seg kring Ap og H. Bygdebyane Hafslo og Gaupne vel inn "sine eigne", og utkantane vert gløymde i kampen. Det er dette ein kallar demokrati, talet på røyster er det einaste som tel. Ikkje for det, det kan godt vera dyktige "sentrumspolitikarar", men eg meiner det er sunt med ei blanding - rett og slett (og som eg har vore inne på før) ein veit best kor skoen trykkjer som har den på. Eg veit ikkje til fulle kva det vil seia å vera innbyggjar i Gaupne eller på Hafslo, kva som er viktigast for innbyggjarane der - og dermed dreg eg konklusjonen: dei som bur i Gaupne veit ikkje kva det vil seia av utfordringar å bu på Veitastrond. Noko kan ein tenkja seg til, men det beste er om nokon som verkeleg veit kan ytra dette der beslutningane vert tatt! Eg er skuffa fordi eg verkeleg hadde inntrykk av at Luster (og Ap som eg stod på lista for) verkeleg ville gå inn for å vera eit samlande parti no -at det var andre takter og tider i Luster. Rausheit, samhald, heilskap o.s.b. Drit og dra. Men, det er ikkje Torunn og partiet sin feil, det er Lustringane. Det er synd at bustadadressa skal vera så avgjerande for om ein får vera med å leika eller ikkje. Vel, vel slik vart det no ein gong denne gong. Ved å fjerna strykinga på listene kom det seg litt, men så lenge det er muleg å kryssa og "slengja" veit ein i realiteten ikkje heilt kva ein stemmer på. Men, det heiter visst demokrati....Det vil sikkert ta nokre tiår før Luster kan framstå som ein heilskapleg kommune med godt samhald, brei representasjon og rausheit. At alle kan bli inkludert, og alle delar av denne vidstrakte kommunen verdsett for sine kvalitetar og representantar. Inntil vidare får me kanskje berre innfinna oss med at dette er eit stykkje fram, og at me må finna andre vegar for å få til det me vil - og det gjer me nok! Makta ligg ikkje eine og aleine hjå "dei folkevalde" politikarane- heldigvis! Ha ei strålande helg!