Mai, og endeleg kom våren, eller sommaren?!

Vips så var det nesten gått ein månad igjen. Det har no skjedd litt sidan sist, så me får prøva med ei oppsummering :-). Andre helga i mai var me i konfirmasjon på Nesodden, til Amanda, som er mitt søskenbarn - og den siste konfirmanten i den generasjonen på morssida. Det var ein kjekk tur, og vesle Thea Marie var snill og grei heile turen - og returen med! Fint å møta slekta att, ein del av dei er det sjeldan me ser. Stort sett samlast me ved slike festlege høve, så då vert det oftast ei stund imellom... Det var iallefall ei veldig fin helg og feiring! På oppatt vegen søndag var me innom Veikåker gård, og høyrde om dei hadde nokre høner til sals (!!), men til tross for at dei hadde 728 høner..., solgte dei ikkje det - berre egg. Men, no har me fått namn og nummer på ein høneleverandør, så då vert det nok høns på garden att snart får me tru ;-)

Elles har me feira 17-mai, Thea Marie sin første!! Feiringa foregikk i Solvorn, med tog, kyrkje, gryterett, is, pølser og leikar der (i for det meste sol og varmt vêr!). Etterpå bar det på teater med far og dei eldste jentene til Sørheim, medan mor og minsta vart heime.. Me var i grunn godt nøgde med feiringa då me kom att frå Solvorn :-)

Sesongen har såvidt byrja på Urnes Gard, og eg og syster Randi (og Thea Marie) har rigga kafe og låve ++ til gjestar. Me hadde pangopning i helga med middags- og overnattingsgjester laurdag, og frukost- og lunsjgjester søndag, samt open kafe begge dagar. Det var varmt og godt ver (over 20 grader) og masse folk! No vert det ope neste helg og, før me opnar "på orntli' 1.juni (som òg er dåpsdagen til Thea Marie. Og det er visst berre 14 dagar til !!! knapt.. ) Ja, ja, me har heldigvis gode hjelparar rundt omkring, og handlelista er så godt som klar. No skal me berre prata litt med presten og få resten på stell så blir det bra. Satsar på det blir ein flott dag!

I dag har me vore ein tur på Sørheim og feira onkel Kjell Ove som har bursdag, før me returnerte til bursdagsselskap til Ylva på låven! Heidi for avgarde i bursdag på Hafslo. Det var den pinsehelga :-)) God kveld i stuggu.

Ja, og gammelstova tek form! Puslespelet til Svein er på plass, muren ferdig pussa, og veggane frie for tapet og pussa (med pussemaskin)

Dorthe gensaren til Ingvill vart omsider ferdig..

Jenter på tur (i ein bilgarasje på Hønefoss)

Gjengen "henger ved frukt og godteri (!) sjappa"

Eg og tante Unni

Jentene mine og konfirmanten

Artige skilt på gardsutsalet på Veikåker gård

Ut på trilletur, aldri (nesten) sur :-)

Søskenbarntreff på kaia før avreise til Solvorn

 

Vesle-jenta i finstasen

 

Hipp hipp hurra for 17-mai!

 

Fine 17-mai jenter

Thea Marie hjelper til med klargjering av kafeen! Ein liten gledesspredar på disken!

Familien på benken

   

Bepanthen, byggje, dåp og syden!

Jepp, det var kort oppsummert ingrediensane i dette innlegget. For å byrja med det første først: eg er blitt ein vaskeekte Buzzador, og det må takast på alvor ;-). Det går kort og greit ut på å marknadsføra og testa ut ulike produkt ein kan få tilsendt. Eg har motteke mi første kampanje, som er kremen Bepanthen; ein salve som førebygger og pleier røde stumpar, då den er spesielt laga med tanke på spedbarnspleie, men kan og brukast på sprukne/tørre lepper og hender, ved solbrenning m.m. Den kan kjøpast på apoteket. Eg hadde fått ei lita testtube i ein baby-pakke frå apoteket tidlegare, så eg visste at denne er god! Det var kampanjeinfoen.

 

Byggje, ja... Eg og Thea Marie driv og "putlar" litt med å fjerna tapet av byggjeveggane på "gammel-stova" innimellom. Det er greit putl det desse regnvêrsdagane me har hatt siste veka! Det er innomdørs og under tak. Og, det vert såå fint, om eg skal seia det sjølv - og det gjer eg jo ;-) Damp-maskina" frå Biltema fungerer ganske greit, men tid tek det - forståss.

 

Gamle forsegla brev er brukt som tetting i sprekkene mellom tømmerstokkane

Fyllingsdørene skal og få seg eit strøk maling etterkvart.

Så var det dåp, ja. Kom plutseleg brått på at det må me jo ha! Så ordna det seg heilt fortreffeleg, med at ei av dei andre mødrene på barselgruppa kunne fortelja at dei hadde tinga dåp i Urnes stavkyrkje 1.juni! Bingo, det passa bra, så då fekk me henga oss på den. Så no må me snu oss litt rundt med invitasjonar, matplanlegging og slikt som høyrer dåpen til. Det vert bra, og me er heldige som har låven til disposisjon til selskapelegheiter!

Og sist, men ikkje minst: me skal på ferietur til hausten, til syden! Dette gledar jentene seg noko voldsomt til. Dei har hatt lyst til syden lenge, og no slo me til. Passar og fint, sidan vesle Thea Marie då (forhåpentleg ;-) ikkje har byrja å gå enda, og at eg har permisjon! Alt klaffa, og me gledar oss til sol, varme og ferie - og har starta nedteljinga (allereie...greit med noko å gleda seg til).
Til slutt ein link til ein fin sang: http://youtu.be/4Bkahcz3E1g

That's all for now folks, thank you and good bye :-))

Barselgruppe treff!

I forgårs var eg og minste-mor på første barselgruppemøte på helsestasjonen. Me var fem mødre med babyar fødd i januar, to gutar og tre jenter. Det var kjekt å møta fleire "i same situasjon" og høyra på deira erfaringar og kvardag med junior! Første vaksine var og denne dagen, ikkje kjekt, men heldigvis fort over.

Ettersom det nærmar seg sommar og turistsesong hareg og søster Randi hatt vår andre store "eplekake-bake-dag" i Fjordatunet i dag. Det er greit å få unna mange på ein gong når me først set i gong, og der inne er tilhøva gode for akkurat det. Thea Marie var med, sjølvsagt (må følgja meieriet ho ;-), og sov stort sett under heile seansen - som sist!

Søndag var det regnver, ogdet var nesten litt merkeleg... Lenge sidan det regna sist, men no gjer det nok godt på dei turre markene. I "gammel-stova" går det framleis framover - heldigvis: no er taket måla, og pipa er pussa!

Ingvill og Thea Marie

Stadig utprøving av nye oppskrifter...Desse vart ganske bra, om eg skal seia det sjølv!

Liten trille-medhjelpar

Nymåla tak!

Pussa mur!

Dei to eldste gullungane, i ei litt yngre utgåve : )

40 og fortsatt feiande flott..!

Jepp, det stod det på eit kort eg fekk i høve den store dagen min, 3.april! For første gong på nokre år feira me ganske skikkeleg, eg og søster Randi som òg hadde "halvrund dag" i midten av mars. Me hadde kakefest  på låven i går! Masse gode kaker, som me kosa oss med å baka og planlegga. Mamma og eit par andre kom og med kaker, så tilsaman var det 16 kakesortar på bordet. Vener frå grendene her og familie kom for å feira oss, og det var veldig koseleg : ) Mykje fine gåver fekk med òg. Jammen kjekt med bursdag! Restar var ikkje til å unngå (!) sjølv om me prakka på folk litt med heim til kveldskaffien... Så då får me heller ta nokre etterpåselskap! No veit de at det er mulegheiter for noko attåt kaffien om de tek ein tur innom ein dag! Velkommen!

Fekk forresten mykje fint på sjølve dagen min òg! Alt frå heimesydd "orden-i-strikkesakene-mappe" til flybillett til familietur til blomar, til allvërbukse til miniselje-tre (2 stk!!) til vin og krus til...ja, masse flott! Tusen takk alle saman :-)

Det strålande veret fortset, og me er takksame for det! Kunne ikkje ønskja meg eit betre permisjonsver. Førre helg var me ein tur i fjøra og grilla, og då fann Heidi ein flaskepost! Med brev inni! (Ja, no er det vel eigentleg det som er ein flaskepost...). Me (mest eg, kanskje) vart i fyr og flamme, for eg kan ikkje hugsa å ha funne det før. Flaskeposten var sendt frå Fodnes i juli i fjor, så eit lite stykkje har den no farta. Namn og adresse på avsendaren var tydeleg nok, så no vert det å senda eit godt gamaldags brev sørover! Artig!

Same søndag ettermiddag var me i Gaupne og feira bestemor som har bursdag dagen før meg. Det vanka kaker, bollar, påsmurde og marsipankake på oss der òg.

Grilling i fjøra - eit sikkert vårteikn : )

Spennande då det dukka opp ein flaskepost på stranda... 

Eit noget medfare, men dog leseleg brev i flaska

Barkebåten seglar utpå dei 7 hav...

Eitt av to søte mini-seljer eg fekk på bursdagen min!

 

Strikke-ordens-mappa slo an!

Trøystande ord...

Så sant, så sant!

Jentene laga kjempeflott kakepynt av smelta sjokolade!

Kakebord 1

Kakebord 2

Kakebord 3

Mellomste håpefulle lurte på om mamma hadde fått så mange presangar før til bursdagen ; ) Lønner seg med bursdagsselskap og kakeparty ;-))

Kreativt og flott kort, med knakande fin tekst!

Vår vesle Thea Marie

Søskenbarntreff i påska!

Meir påske!

I dag er det påskafta, og i dag er eg verkeleg nøgd med tingenes tilstand! Mannen og svoger Dag støypte golvet i det som skal bli spisestova i dag! Då kan me snart ta til på fjerninga av tapeten på tømmerveggane som me vil ha fram att, samt at taket må få seg eit målingstrok før me legg golv. Rundt omnen skal det støypast ned heller. Mellomste jenta var med tante og Co for andre dag på rad i trekket, og det var om muleg enda meir stas enn i går! Eldste framleis noko skranten i halsen, og derfor heime. Lammelår-middag vart nytta som "belønning" for støypejobb og ski-følgje, og medan låret godgjorde seg i omnen tok eg og Thea Marie oss ein runde rundt neset. Både mor og dotter kosa seg på trilling i fineveret. Eg snakka om "påske-kreka" som fann vegen frå kottet sitt og ned i stova i eit innlegg her tidlegare, og under ser de nokre av eksemplara... Elles har påska inneholdt basar på Sørheim, middag hjå slekta på Sørheim, kaffibesøk og avslapping. Heilt utruleg påskevêr i år, ein vaknar til klår blå himmel kvar morgon, og etterkvart ei strålande sol! Betre kan det ikkje bli. No har påskafta som sagt kome, gjestane har reist og far og mellomste dotter er på basar nr. 2 denne påska, denne gong her på Ornes. Resten av gjengen held oss i heimen resten av kvelden, med strikk, tv og påskeegg med godis i ;-)

Dag støyper golv!

Det står ikkje på påskeegga! Og samlinga veks kvart år....

 Påskerosa mi!

Desse to snakkar vel for seg sjølve.....

Det spirer og gror i glaskarmen; paprika, tomater, purre og nokre blomar!

Dei to yngste på basar på Sørheim

 

Kaffibesøk på Sagi

Gåsungar med påskepynt på trappa

Påskeferie med snørr og sol...

Jepp, me snørrar på vidare i solskinet. Vesla, og no ho mor sjølv hanglar enda; hostar og harkar, og sprayer saltvatn og otrivin både her og der. I det strålande veret som er no om dagen er det ikkje akkurat stas å halda seg inne, så i går tore me oss ut ein spasertur i sola, og i dag vart det ein tur på handel i Skjolden. Godt med nokre små utflukter. Mellomste håpefulle fekk vera med tante og familien til Turtagrø i dag, og det hadde vore heilt topp visst - sol og stille, kvikklunsj og kakao. Eldste jenta var med på handel, då ho ikkje er heilt i toppform att ho hell. Mannen har arbeida flittig siste dagane med å klargjera til støyping av golv i det som skal bli "beststove". Eg er litt handtlangar og kaffiberar innimellom bleier og mating. Påska har no uomtvisteleg kome i hus, og gule små krek i allemulege fasongar poppar fram.

Spisestova tek form...

 Jentene var med Marta på piknik ovom kyrkja her om dagen. Ingvill her i fritt svev....

Tante G kom med bæresjal som me måtte få litt instruksjon i bruken av. TM tykte det stod til!

 Ingvill var med onkel Dag og pappa på isfiske på Sørheim, og kom heim med lyr som me hadde til middag same dag!

Folk som kjem på visitt til oss kan få seg eit smil no. Ingvill har ordna "take a smile" plakat, der dei som vil kan ta eit smil:-)